Ég fór í vikuferð með pabba mínum til Ítalíu núna í lok ágúst. Við byrjuðum ferðina á að gista fjórar nætur á Merumalia Wine Resort og what the hell hvað það var geggjað. Ég get einfaldlega ekki mælt meira með þessum stað. Agriturismo eins og það gerist best. Merumalia er vínakur staðsettur rétt fyrir utan bæinn Frascati og með útsýni yfir Róm. Hjónin Luigi og Maria Teresa sem reka staðinn rækta lífrænt hvítvín og ólívuolíu. Mér fannst ekki leiðinlegara að komast að því að þau væru líka að rækta tómata, eggaldin, paprikur, kúrbít, ætiþistla og alls konar kryddjurtir. Þau leggja mikið upp úr því að vera sjálfbær og allt sem þau framleiða á staðnum er lífrænt. Við pabbi ákvaðum að fara í vínkynningu hjá Luigi þar sem hann sagði okkur frá allri starfseminni og við smökkuðum (drukkum) vínin sem þau framleiða. Eftir vínkynninguna gáfu þau okkur grænmeti sem þau rækta og við elduðum það að sjálfsögðu um kvöldið. Næstu dagar fóru í það að drekka meira hvítvín og skoða náttúrufegurð Castelli Romani.
Eftir dvöl okkar á Merumalia ferðuðumst við til Sperlonga og eyddum seinustu dögunum á ströndinni.
Ég hafði mjög gaman af því að á mörgum stöðum voru flokkunardallar í miðbæjum og víðar. Mér fannst Ítalirnir vera bara með nokkuð skemmtilegar útfærslur á döllunum og ég setti inn myndir af nokkrum útfærslum hér fyrir neðan. Það væri svo ótrúlega skemmtilegt ef maður færi að sjá svona í bæjum og borg hér á Íslandi.
Annars ætla ég að leyfa myndunum að tala sínu máli.
svonablogg 